الثلاثاء، 12 فبراير 2013

انا بنت عادية لكن مصرية ...////

أنا بنت عادية قلبى كبير قلب يساع كل الدنيا

أمى قالتلى بأن الطيبة باينة فى كل ملامح فيا

أنا فى الأصل بنت عادية

كل طموحى وكل أمالى أنى اتمتع بالحرية

مش من حقى أنى أعيش جوة فى بلدى عيشة هنية

ده أبسط حقى ياوكلين حقى 

ونسين أنى مصرية

تقولوا العدل .. شوية صبر 

ألقيكو شوية حرمية 

لا همكو دين .. والا دم يسيل 

والا دعوة أم تقول يارب خلص ليا

قتلتو حقوقنا محيته كل الأدمية

كرمتنا ماتت أهالينا ماتت

وانتو عيونكم معمية

أنا بنت صحيح وبنت عادية

لكن مش هااسكت 

وانا سامعة بلادى بتنده ليا

 حررى فى قيودى

بتقولى كفاية كدة ظلم عليا

وحقوق ثوارك راح تفضل دين

على كل مصرى ومصرية 

هاتعيشى يابلدى وهاترجعى تانى

زى ماكنتى مصر قوية 

وده وعد منى وخديه عليا

أنا بنت عادية لكن مصرية



كلام من القلب

بقلمى المتواضع
بسبوسة بنت مصرية

هناك 4 تعليقات:

  1. على خدك علم فى وسطه نسر فارد جناحه قصادى
    البنت بكر و صوتها عام عالنشيد فى بلادى
    سمعتنى كلام بيرعش فى القلوب مش عادى
    سلميه و عيشه هنيه بحريه لجل الكرامه تنادى
    و حلم واحد صارخه بيه كل الايادى
    البنت كانت فى الميدان ثايره على حاكم جبان و عاللى خان
    البنت ثايره المره دى
    البنت زى الولد فى الحلم يجرى فى العروق مش هادى
    البنت غنت فى الميدان مصر التى ساكنه فؤادى
    جاى يبنى المجد فيكى عنادى
    يحميكى دمى و من ورائى ولادى
    . . بلادى . .

    ردحذف
  2. الله الله ايه الكلمات الجامدة الى فى الجون دى بجد تحفة
    تسلم ايدك مليون مرة

    ردحذف
  3. الله عليكى وتسلم الايد اللى كتبت

    ردحذف

بحث هذه المدونة الإلكترونية

Translate